LAUSN, er fyrirtæki sem býður upp á meðferð, ráðgjöf, handleiðslu og kennslu fyrir einstaklinga, fjölskyldur og hópa.

LAUSN sinnir þörfum fullorðinna sem og barna óháð aldri. Fyrirtæki og stofnanir geta óskað eftir þjónustu þessari jafnt sem einstaklingar.

LAUSN er fyrir þá sem vilja á eigin forsendum eða fyrir tilstuðlan annarra ná meiri árangri í lífi og starfi.
Meiginmarkmið:
• Að vinna eftir lausnamiðaðri hugmyndafræði (Solution Focused Brief Therapy)

• Að veita sérhæfða og sveigjanlega þjónustu í meðferð og ráðgjöf fyrir einstaklinga, pör/hjón, fjölskyldur og fagfólk.

• Að veita séhæfða handleiðslu og kennslu meðal annars í tengslum við helstu menntastofnanir landsins

• Að halda námskeið fyrir stofnanir og fyrirtæki, sem miða að því hjálpa fólki að ná meiri árangri í lifi og starfi.

Lausn, fjölskyldumeðferð og ráðgjöf er til húsa í Sæviðarsundi 74

Hugmyndafræðin að baki er lausnamiðuð skammtímameðferð (Solution Focused Brief Therapy).

Verkefni:
• Einstaklings- og fjölskyldumeðferð
• Handleiðsla fagfólks og nema.
• Stundakennsla í HÍ og fyrirlestrahald í ýmsu samhengi.
• Bókin Börn eru klár, var þýdd á ísl. af HÞ og gefin út af JPV í ágúst 2006 en það er handbók fyrir uppalendur og þá sem vinna með börnum.
• Lausn býður upp á námskeið í notkun bókarinnar og selur verkefnabækur sem fylgja.
• Námskeið eru í boði hjá Endurmenntun HÍ
• Séhönnuð námskeið fyrir fagfólk, sofnanir og fyrirtæki

Þjónustan:
Meðferð: Fyrirtækið býður upp á sérhæfða einstaklings- og fjölskyldumeðferð. Fólk getur leitað eftir þjónusunni á eigin forsendum en einnig stofnanir og fyrirtæki.
Kennsla og handleiðsla: Kennsla við helstu menntastofnanir sem byggir á faglegum grunni fjölskyldufræðanna og lausnamiðaðrar nálgunar.
Handleiðsla við fagfólk sem er að vinna í meðferðar- og kennsluaðstæðum.
Námskeið og ráðgjöf:Stofnanir, fyrirtæki og félög geta óskað eftir ýmsum námskeiðum í boði fyrirtækisins. Áhersla er lögð á að gefa fólki tækifæri, með ákveðnum leiðum, að auka árangur í lífi og starfi.
Ýmsir námskeiðspakkar eru í boði fyrir ólíkahópa.
Dæmi um námskeið:
• Betri árangur í lífi og starfi; Lausnamiðuð nálgun. Fyrir alla sem vilja ná meiri árangri í lífi eða starfi.

• Lausnamiðuð fjölskyldumeðferð; hugmyndafræði og beiting í meðferðrvinnu. Aðallega ætlað við kennslu í háskólum eða fyrir starfandi faghópa.

• Reteaming; Markvisst samstarf á vinnustað. Liðsheildarvinna, ætluðð fyrirtækjum og stofnunum.

• Samskipti til árangurs, jákvæð og lausnamiðuð nálgun í samskiptum

• Aukið sjálfstraust, meiri árangur! Fyrir einsaklinga og hópa.

• Börn eru klár; Ég get-aðferðin. Ætlað fólki í vinnu með börnum, bæði fagfólki og öðrum uppalendum

• Virðing skal höfð í nærveru sálar. Ætlað þeim sem eru að hjálpa öðrum.

Lausn býr yfir víðtækri starfsreynslu og góðri menntun. Langri reynslu af meðferðarvinnu, námskeiðahaldi og kennslu. 
Unnið er eftir jákvæðri og markvissri hugmyndafræði, “Slution Focused Brief Therapy”.
20 ára reynsla af fjölskyldumeðferð og þar af 15 ára reynsla af rekstri Fjölskylduþjónustu.
Þekking og reynsla af menntakerfinu, félagskerfinu og heilbrigðiskerfinu.
Góðu orðspori, áhuga, þekkingu og sjálfstæðum vinnubrögðum.

Stofnandi fyrirtækisins og eigandi er Helga Þórðardóttir,
kt. 150853-5759 til heimilis að Sæviðarsundi 74, 104 Reykjavík.
Helga er menntaður kennari/sérkennari frá KHÍ, félagsráðgjafi frá Svíþjóð og fjölskyldufræðingur frá EHÍ og Brief Family Therapy Center i USA með mastersnám í Félagsvísindum frá Hollandi. Helga lauk námi í Brautargengi í maí 2007. Helga hefur unnið við kennslu, meðferð og stjórnun bæði hjá Ríki og Reykjavíkurborg.

Ástæða þess að fyrirtækið vill bjóða upp á þjónustuna:

1. Hef langa reynslu af því að vinna eftir lausnamiðaðri hugmyndafræði með góðum árangri, með einstaklingum, fjölskyldum og hópum. Lausnamiðuð nálgun leggur áherslu á að hver og einn sé sérfræðingur í eigin lífi, og einstaklingurinn búi sjálfur yfir lausn á vanda sínum og að fagaðilar séu einskonar þjálfarar. Margir sérfræðingar vinna við að segja fólki hvað er þeim fyrir bestu. LAUSN telur að besti árangurinn fáist hins vegar með því að fá fólk til að taka sjálft ákvörðun um eigin markmið og hjálpa þeim svo við að skilgreina leiðirnar. Þetta á við um einstaklinga jafnt sem hópa.
2. Fólk vill geta valið sjalft til hvaða sérfræðings það leitar þegar það þarf á hjálp að halda. Td. vilja ekki allir leita á þjónustumiðstöð og verða til sem mál í málaskrá til frambúðar. Sumir vilja einfaldlega fá aðstoð hjá óháðum aðila þar sem persónuupplýsingar eru ekki skráðar í upplýsingabanka.
3. Mikilvægt er að leggja áhersla á heildarmyndina við vinnslu mála. Það er allt of oft verið að vinna með afmarkaða hluta af myndinni eftir því í hvaða kerfi málið er.
4. Markviss vinna er oft ekki fyrir hendi en LAUSN leggur áherslu á að markmið séu skýr, raunhæf og aðgerðabundin (skref fyrir skref) og að öll lítil jákvæð skref séu gerð sýnileg.
5. Mikill tími fer oft í það að reyna að finna orsök fyrir vanda, en mun árangursríkara er að horfa fram á við og finna út hvað á að koma í stað vandans og setja upp skýr markmið í framhaldi af því.
6. Rannsóknir hafa sýnt fram á að árangursríkasta tækið í öllu uppeldi sé hrós og hvatning. Allt of oft eru það aðfinnslur og refsingar sem taka völdin og eftir situr lélegt sjálfstraust og niðurlag einstaklinga. Hin ýmsu kerfi td. félags-, skóla- og heilbrigðiskerfi eru mjög vandamálamiðuð og mikill tími og orka fer í að kryfja vandamál og koma með skýringar. LAUSN leggur áherslu á að leita uppi og hjálpa til við að draga fram styrkleika fólks.
7. Áhersla er ekki nægjanleg á fyrirbyggjandi starf vegna þess að tími og orka fer öll í að bjarga þegar í óefni er komið. Fyrirbyggjandi starf er td. fjölskyldumeðferð, Hjóna- og skilnaðarráðgjöf, sjálfsstyrking fyrir einstaklinga og uppeldisráðgjöf sem LAUSN sérhæfir sig í.

Hvað er lausnamiðuð fjölskyldumeðferð?
Lausnamiðuð meðferð er áhrifamikil, árangursrík og sannprófuð leið til að ná fram jákvæðum breytingum hjá einstaklingum, fjölskyldum, hópum og fyrirtækjum.
Lausnamiðuð nálgun felur í sér ný sjónarhorn: Lausnin ekki vandamálið, framtíðin, ekki fortíðin, það sem gengur vel, ekki það sem gengur illa.
Á hvaða hátt er lausnamiðuð nálgun frábrugðin?
Með því að hafa augastað á lausninni, leita að henni, finna hana og tala um hana, þá er þeirri hefðbundnu skoðun hafnað að vandamálið leysist með því að kryfja það.

Vilt þú:
bæta samskiptin
verða öruggari
styrkja þig í foreldrahlutverkinu
bæta sambandið við maka þinn
ná samkomulagi varðandi barni/börnin við fyrrverandi maka
láta þér líða betur í vinnunni
vera sáttari við lífið
vinna markvisst í markmiðum þínum
vera betri í almennum samskiptum
standa þig betur í vinnunni
breyta lífsháttum þínum

Ef eitthvað af þessu á við þig áttu erindi á LAUSN!

Undanfarið hefur verið mikil umræða í fjölmiðlum um það af hverju fólkið sem er í miðbænum um helgar hegði sér eins og það gerir. Talað er um fólk sem ræðst hvert á annað og meiðir, fólk sem væflast um undir áhrifum og ógnar öðrum vegfarendum og gengur um án nokkurrar virðingar, fólk gengur jafn vel örna sinna í húsasundum og í görðum.
Komið hafa fram ýmsar skýringar á þessari hegðun og ýmsar hugmyndir eru uppi til úrbóta. Svona skemmtanalíf er ekki það sem við borgarbúar erum stolt af, við viljum geta gengið óáreitt um göturnar og notið þess sem borgin hefur upp á að bjóða án þess að eiga á hættu að á okkur verði ráðist eða þurfa að klofa yfir sóðaskapinn í stígvélum.

Það er greinilegt að það er mikill vandi til staðar og viðbrögðin við honum hafa ekki dugað hingað til. það eru margir sem ekki hafa lært að taka ábyrgð á hegðun sinni og eiga eftir að öðlast færni í því að umgangst aðra og umhverfi sitt af virðingu og þeir verða að læra það.
Samfélagið þarf að hjálpa þessu fólki að öðlast færni til að lifa í samfélagi við aðra og kenna því að taka ábyrgð á gjörðum sínum og sjálfum sér. Það eru til viðurlög við svona hátterni eins og að framan er líst, en viðurlögin þurfa að koma að gagni, ekki læra menn þessa hluti í fangelsum landsins eða hvað?
Þroskuð ábyrgðartilfinning er undirstaða heilbrigðrar sjálfsmyndar. Ábyrgðartilfinning felur meðal annars í sér að taka tillit til annarra og umgangast umhverfi sitt af virðingu, verja þá sem eru minni máttar og hjálpa öðrum. Fyrir flesta er þetta hið auðveldasta mál en það virðist sem aðrir þurfi meiri tíma, meiri kennslu, meiri leiðbeiningu og jafnvel beina þjálfun í því að tileinka sér ábyrgðartilfinningu.
Þeir einstaklingar sem ekki geta sett sig í spor annarra, virða takmörk og fara eftir lögum og reglum, hefðu þurft meiri tíma og hjálp til að læra þessa hluti. Það er staðreynd að börn og unglingar eiga mis auðvelt með að þróa þessa hæfni með sér og því þarf að gefa þeim færi á hjálp og leiðbeiningu og þann tíma sem þau þurfa. Ef þessi börn fá ekki hjálp verða þau sífellt til vandræða fyrir samfélagið þegar þau eldast.
Það er nauðsynlegt að vinna fyrirbyggjandi og kenna og þjálfa eins og allt annað sem börnum er kennt frá upphafi. Foreldrar og aðrir uppalendur eru eflaust mjög meðvitaðir um nauðsyn þessa, en við þurfum að leggja enn þá ríkari áherslu á þennan þátt í því nútíma-hraða-samkeppnis-samfélagi sem við lifum í. Ábyrgð leik-og grunnskóla er mikil og öll umræða um mikilvægi þessa er algjör forsenda þess að börnin okkar læri að umgangast aðra, taka tillit og bera virðingu.

Það þarf að auka almenna umræðu um mikilvægi ábyrgðartilfinningar og það mun skila sér eins og hver annar áróður sem vandað er til. Það eru viðurlög við því að beita ofbeldi og skemma eigur annarra en peningasektir eða fangelsisvist kemur ekki endilega í veg fyrir að einstaklingurinn endurtaki brot sín, það sýnir reynslan okkur. Viðurlögin við brotunum eru nefnilega ekki endilega þau sem virka til að breyta atferli einstaklingsins og breyta lífsháttum hans. Með ákveðnum leiðum er hægt að hjálpa fólki að breyta. Samkennd og virðing er ekki meðfædd og hana þarf að læra og það er aldrei er of seint að að læra nýja færni.
Uppeldi til ábyrgðar felur í sér alla þætti aukinnar ábyrgðartilfinningar og þess vegna er svo mikilvægt að taka rétt á því þegar börn og unglingar gera eitthvað af sér. Þegar það gerist skapast aðstæður sem eru mjög mikilvægar og þær bjóða upp á mikla möguleika til að breyta. Þess vegna er svo mikilvægt að rétt sé brugðist við svo tækifæri þessara einstaklinga, til betra lífs, glatist ekki. Árangursrík umræða eftir að barn eða unglingur hefur gert eitthvað óábyrgt af sér er áhrifamikil leið til að kenna þeim að finna fyrir ábyrgðartilfinningu. Einstaklingurinn þarf að standa frammi fyrir broti sínu og viðurkenna brotið, hann þarf að biðja brotaþolann afsökunar og fá svo tækifæri og hjálp hjá sérfræðingi til að standa við loforð sitt um bætta hegðun. Það sem heldur honum við efnið eru önnur viðurlög.
Þannig fær einstaklingurinn tækifæri til að breyta og tækifæri til að þróa með sér ábyrgðartilfinningu. Taka þarf á þessum hlutum á uppbyggjandi hátt svo að líkurnar á því að brotin endurtaki sig minnki eða hverfi.

Höfundur er félagsráðgjafi og fjölskyldufræðingur og rekur LAUSN, fjölskyldumeðferð og ráðgjöf.

Þegar við erum í vanda eða erum ekki að ná árangri, þá spyrjum við okkur sjálf gjarnan “af hverju”- spurninga. Við viljum finna ástæðuna fyrir vandanum. Þetta getur verið mjög tímafrekt, krefjandi og erfitt og ekki alltaf til árangurs. Orsök þess að okkur líður ekki vel eða okkur er ekki að takast, á sér ekki alltaf eina einfalda skýringu.
Þegar við viljum breyta einhverju í lífi okkar, hvort sem það er persónulega eða í sambandi við vinnu, þá vitum við líka hvernig við viljum ekki hafa hlutina. Ef við hins vegar gefum okkur tíma til að hugsa hvernig við viljum hafa hlutina, þá erum við að hugsa fram á við og komum auga þau markmið sem eru eftirsóknarverð.
Fólk í vanda leitar gjarnan fyrst eftir ráðum hjá fjölskyldu og vinum, en margir leita sér aðstoðar hjá sérfræðingum. Það getur verið stórt skref að taka en getur gert gæfumuninn og því fyrr því betra.
Þegar fólk er líkamlega veikt eða slasað eru flestir sammála því að nauðsynlegt sé að leita til sérfræðings. Í þeim tilvikum þegar um sjáanleg meiðsl eða ákveðna líkamlega sjúkdóma er að ræða þá eru orsakirnar greindar og vísindalegar niðurstöður eru fyrir því hvaða lausn er æskilegust. Þetta liggur ekki eins ljóst fyrir þegar fólki líður illa eða er ósátt.

Á vinnustöðum og í starfsmannahópum eyðum við líka miklum tíma í að skoða af hverju við erum ekki að ná tilætluðum árangri. Ef við hins vegar tökum strax stefnuna á framtíðina og skoðum hvert við viljum fara, þ.e.a.s. breytum vandanum í markmið, þá spörum við tíma og getum farið að einbeita okkur að því að skilgreina leiðir að markinu.

Lausnamiðuð fjölskyldumeðferð er hugmyndafræði sem hefur rutt sér til rúms um allan heim og hefur verið að þróast í um 30 ár. Helstu áherslur eru þær að fólki er hjálpað við að koma auga á lausnir sem virka. Litið er svo á að einstaklingurinn sé sérfræðingur í eigin lífi og að enginn viti betur en hann sjálfur hvað hann vill og hvað kemur honum að bestum notum, meðferðaraðilinn er hins vegar eins og þjálfari.
Fortíðinni getum við ekki breytt,en vandinn er viðurkenndur eins og hann birtist fólki og vandanum síðan breytt í markmið. Í lausnamiðaðari hugmyndafræði skiptir fortíðin ekki máli að öðru leiti en því, að koma auga á og draga fram góða og jákvæða upplifun og reynslu.

Margir setja sér markmið þegar þeir vilja breyta einhverju í lífi sínu eða ætla sér að ná meiri árangri. Þá er mikilvægt að markmiðin séu skýr, raunhæf og eftirsóknarverð og betra að þau séu mælanleg.
Líklega vilja flestir setja sér eigin markmið enda hlýtur árangurinn að vera í samræmi við það. Með lausnamiðaðri meðferðartækni er reynt að tryggja að fólk, einstaklingar, fjölskyldur eða hópar, eftir því hvað við á, séu örugglega að vinna í eigin markmiðum. Litið er svo á að lausnin sé fólgin í undantekningunni frá vandanum, þ.e.a.s. þegar vandinn er ekki til staðar eða minna er af honum. Þess vegna er áherslan lögð á það sem nú þegar gengur vel og fólk hvatt til að gera meira af því.
Hvatning og hrós eru lykilorð í öllu uppeldi og virkar mun betur en skammir og aðfinnslur og á við í öllum samskiptum. Og ef við einblínum á vandann og hindranirnar þá komum við ekki auga á styrkleikana og missum af tækifærum til að hrósa.
Árangur er reglulega metinn á skala frá 0-10. Einfaldur skali sem notaður er til að mæla hvaða árangri er nú þegar náð Slíkt mælitæki er notað á ýmsan hátt, t.d. til að meta tilfinningar, líðan, trú á árangur, framfarir og fleira. Þannig verður vinnan markviss og áþreyfanleg.

Lausnamiðuð nálgun og lausnamiðuð fjölskyldumeðferð “Solution Focused Brief Therapy” hefur áunnið sér fastan sess víða um heim. Upphafsmenn hennar voru hjónin Insoo Kim Berg og Steve de Shazer (d.11.sept. 2005) frá Milwaukee í Bandaríkjunum. Þau hafa skrifað og gefið út ógrynni bóka og greina um hugmyndafræðina sem margir fremstu meðferðar- aðilar heims hafa tileinkað sér og þróað áfram.
Insoo Kim Berg er væntanleg hingað í október en þá verður haldin hér alþjóðleg fjölskyldumeðferðarráðstefna á vegum IFTA International Family Therapy Association og FFF, Félags fagfólks í fjölskyldumeðferð.

Höfundur er félagsráðgjafi/ fjölskyldufræðingur og formaður FFF, og
rekur LAUSN, fjölskyldumeðferð og ráðgjöf í Þarabakka 3, 3. hæð.

Góðan daginn gott fólk og til hamingju með daginn!

Ég er þakklát fyrir að fá að vera hér með ykkur og þessum frábæru karlmönnum sem halda fyrirlestur hér í dag. Ég get reyndar ekki stært mig af því að hafa skrifað bók, enn þá, en hef reyndar þýtt eina sem kom út í ágúst í fyrra og heitir Börn eru klár!

Ég ætla að nota tímann núna til að tala um samskipti og það hvernig við sjálf getum gert þau árangursrík og ánægjuleg.

Kannast einhver hér inni við að lenda stundum í samskiptum við þá sem þeim þykir vænt um, sem skila ekki miklu? Td. sem foreldri í samskiptum við börnin eða í samskiptum við maka eða nána vini?

Ég held að það hljóti að vera fleiri en ég sem hafa staðið sjálfan sig að því að vera að tala um sama hlutinn aftur og aftur, tuða og ekkert breytist. Jú það sem gerist er að ég verð pirruð, hækka jafnvel röddina og þusa ennþá meira um sama hlutinn . Ég heyri í sjálfri mér og hugsa, þetta er ekki það sem ég vil, þetta eru ekki þau samskipti sem ég vil hafa við barnið mitt eða maka minn.

Sá sem ég var að tuða í er líka orðinn pirraður og jafnvel farinn eða alla vega löngu hættur að heyra hvað ég var að segja. Mér þykir allt of vænt um þessa einstaklinga til að vera í svona samskiptum við þá. Svona samskipti gera mig líka orkulausa og vansæla.

Ég finn að ég þarf að gera eitthvað annað sem virkar betur.

Það hefur verið sagt um hjónabandið að það sé fullt af spennu og pirringi.
Fyrsta árið talar aðallega maðurinn og konan hlustar.
Annað árið talar aðallega konan og maðurinn hlustar
Þriðja árið þá tala þau bæði og nágrannarnir hlusta.

Ekki þori ég að fullyrða að þetta sé svona, en í nánum samskiptum þurfum við oft að leysa ágreining og finna lausnir og það reynist ekki öllum jafn auðvelt, enda sjáum við það á tölfræðilegum niðurstöðum að skilnaðartíðnin er orðin mjög há.
Það eru margir sem ekki finna lausnina þrátt fyrir miklar umræður um vandann.

Eru kanski einhverjir hér inni sem kannast við eitthvað af þessu þegar þið eruð að æsa ykkur og viljið að eitthvað breytist hjá hinum sem þið eruð í samskiptum við: 
Hvers vegna gerir þú aldrei......
Af hverju þarf ég alltaf ...
Þú ert alltaf svo…
það er alltaf sama…
það gerst aldrei neitt....
Og svo endar kanski umræðan með samskonar rifrildi og síðast þegar við ræddum þetta sama?

Er ekkert gott í gangi, hefur eitthvað farið fram hjá okkur? Höfum við hugsanlega gleymt að minnast á allt það sem okkur líkaði við í fari þessa fólks? Þetta með alltaf og aldrei er ekki mjög uppbyggjandi í samskiptum við fólkið okkar eða hvað?

Oft gerir fólk samkomulag um að breyta, það þráir jákvæðari og meira uppbyggjandi samskipti sín á milli.

Oft reynist vel að setjast niður í góðu tómi og leggja drög að breytingum en þá fer oft umræðan, því miður út í að ræða eingöngu það sem ekki er að ganga vel, sem sagt “vandamálatal”. Svo er gjarnan farið að leita að orsökinni fyrir vandanum, eða hverju sé um að kenna, eins og það breyti því sem liðið er og jafnvel finnst sökudólgur, eins og það breyti öllu. 

Það að hafa skýringu á vandanum leysir ekki endilega vandann eða hvað?

Jú, jú allir reyna að vanda sig fyrstu dagana eftir umræðuna, það er að segja, ef niðurstaðan hefur verið sú að allir ætli að láta þetta ganga. Eftir umræðu um vandann erum við meðvitaðri um það hvernig okkur líður og hversu stór vandinn er.
Við vitum nákvæmlega hvernig vandinn byrtist, ræddum hlutina ofan í grunninn eins og sagt er, en uppgötvum svo, okkur til skelfingar nokkrum vikum seinna, að við erum að takast á um sömu hluti, einu sinni enn.

Það sem við vorum nefnilega að gera var að “fokusera” eingöngu á það sem ekki var að ganga, því fylgja ýmsar ásakanir og svo var orsökin kanski ekki sú sem við héldum.

Það er ekki einfalt að finna út af hverju við hegðum okkur eins og við gerum, ýmsar lærðar kenningar eru til um það. Sumir segja að þetta sé allt í genunum, aðrir segja þetta vera vegna uppeldisins og enn aðrir halda því fram að svona höfum við verið skilyrt og það þurfi að skilyrða okkur upp á nýtt ef við eigum að breytast. Hver svo sem orsökin er breytir það ekki því, að það liðna er liðið. Við höfum alltaf tækifæri til að ráða hvernig við högum okkur í dag og í framtíðinni.

Það er nefnilega því miður ekki alltaf nægjanlegt að hafa góða skýringu á því hvers vegna samskipti ganga illa. Það er okkur samt ansi tamt að bregðast þannig við erfiðleikum í samskiptum, að byrja á að kryfja og skilgreina það sem miður fer og reyna svo að finna orsökina fyrir vandræðunum.

Enginn veit nákvæm af hverju við hegðum okkur eins og við gerum því hegðun er ekki einangrað fyrirbæri. En við sjálf erum samt sérfræðingar í eigin lífi og vitum hvað við viljumog hvað við viljum að breytist og við höfum möguleika á að breyta hegðun okkar sjálfra. Mikilvægt er því að hætta að reyna að breyta öðrum og reyna ekki að halda því fram að við vitum hvað er best fyrir aðra.

Ég fullyrði að það að kryfja vandann og leita að orsökinni fyrir honum er ekki nauðsynlegt til að leysa hann.
En það er hins vegar satt að það eru þúsundir sérfræðinga um allan heim sem hafa viðurværi sitt af því að kryfja vandamál með fólki og segja því hvernig best er fyrir það að leysa þau. Það eru sérfræðingar um allt sem eru tilbúnir að segja okkur hvað sé best fyrir okkur og þeir trúa því (eða telja okkur trú um) að þeir viti það betur en við sjálf. Það er líka fullt af fólki allt í kring um okkur sem eru tilbúið til að segja okkur hvernig best sé fyrir okkur að lifa lífinu. Veit þetta fólk betur en ég hvað hentar mér og hvað ég vil? Ég held að lausnirnar á vandamálum séu oftar innan seilingar en okkur grunar, við höfum bara ekki komið auga á þær!

Breytingar eiga sér ekki stað einungis með því að vera meðvituð um tilfinningar okkar.

Td. þegar okkur líður illa þá erum við mjög meðvituð um það hvernig okkur líður og mjög meðvituð um hversu ósátt við erum við þá stöðu sem við erum í, en það eitt og sér leysir ekki vandann!

Áður en ég fór að vinna eftir lausnamiðaðri hugmyndafræði og tileinka mér lausnamiðaða nálgun í samskiptum við aðra þá eyddi ég mjög miklum tíma í að kryfja þ.e.a.s. að “analysera” vandamál og koma með tilgátur eða ”hypotesur” um orsök vandamála.
Ég var iðin við að kryfja mín eigin persónulegu vandamál og einnig að kryfja með mínum skjólstæðingum, þeirra vandamál.

En ég hef komist að því eftir að ég fór að læra að temja mér nýja hugsun og tala “lausnatal” að mér hefur sjálfri gengið betur að ná eigin markmiðum og ég sé líka að skjólstæðingar mínir ná betri líðan fyrr í meðferðarferlinu.

Þessi nálgun er mun árangursríkari, skjótvirkari og tekur styttri tíma, en sú að kryfja vandann.
Það er staðreynd að fortíðinni getum við ekki breytt en framtíðin er okkar!
Auðvitað er mikilvægt að við nýtum okkur allt það sem hefur gert okkur gott og styrkt okkur sem manneskjurur, en reynum ekki að breyta því sem við getum ekki breytt. Við lifðum það af!

Jákvæð hugsun er hæfileikinn til að sjá hluti á þann hátt að þeir komi að gagni.

En hvað er það sem maður gerir öðruvísi ef maður er lausnamiðaður ?

Við myndum fyrir það fyrsta ekki eyða tíma í að reyna að finna orsökina fyrir því að hlutirnir eru ekki að virka!

Þá myndum við hugsa um það hvernig það væri ef við værum ánægð og sátt og skoða hvað við værum þá að gera.

Við gætum tildæmis reynt að spyrja hvort annað um hvernig samskiptin væru ef það gerðist kraftaverk og vandinn væri horfinn! Hvað værum við þá að gera öðruvísi?

Þá værum við að breyta hugsuninni um vandann, þ.e.a.s. að taka “fókusinn” af því neikvæða og stilla hann á það jákvæða td. það sem við viljum að komi í stað þess sem er ekki að virka.

Umræðan snérist þá um það hvernig hlutirnir væru, ef þeir væru að ganga vel (óskir og vonir) og þannig gætum við breytt vandamálinu í markmið til að vinna að.

Markmiðið yrðum við að vera sammála um að væri mikilvægt og raunhæft. Það er nefnilega svo merkilegt að þegar farið er að skoða hvernig samskipti við viljum eiga, þá eru flestir sammála. Merkilegt, ekki satt?

Annað skrefið væri að skilgreina í smáatriðum hvað við þyrftum að gera til að komast þangað sem við vildum fara.

Skoða síðan hvað við erum nú þegar að gera sem við erum ánægð með. Það er í raun ákveðin skref, sem við höfum nú þegar að tekið í átt að markmiðinu. Skoða svo hvernig hægt eri að gera meira af því sem við erum sátt við og er að virka.

Við myndum td. ræða um kostina sem myndu fylgja því að ná markmiðinu og auka þannig áhugnn, viljan og trúna á árangri.

Þá gæfist okkur jafnframt kostur á að hrósa hvort öðru í stað þess að ásaka eða fara í vörn, sem ýtir undir betri samvinnu.

Við nefnilega missum oft af tækifærum til að hrósa ef við erum alltaf að tala vandamálatal!

Við getum farið strax að vinna í markmiðinu þegar það er orðið skýrt og skilgreina skrefin sem við þurfum að taka.

Svo er eitt mjög mikilvægt, að halda ekki að aðrir viti hvað við erum að hugsa.
Þeir geta ekki vitað hvers við þörfnumst nema við segjum það upphátt.
Þeir geta ekki vitað ekki hvað það er sem okkur þykir vænt um nema við að segjum það upphátt.
Við verðum að spyrja, ef við viljum vita hvað aðrir eru að hugsa af því við getum ekki lesið hugsanir og viljum ekki geta upp á.
Hver og einn verður sjálfur að geta útskýrt hverju hann vill breyta og hvað honum finnst vera að virka og hvert hann vill fara.

Rauður þráður í lausnamiðaðri nálgun er virðingin gagnvart einstaklingnum og hans þörfum.

Lausnamiðuð nálgun til bættrar samskipta gefur góðan árangur og þið getið fengið tækifæri til að kynnast einfaldri og árangurs mikilli leið til þess á námskeiðinu Samskipti til árangurs.

Takk kærlega fyrir

Insoo Kim Ber og Steve Shazer

Insoo Kim Ber og Steve Shazer

Börn eru klár!

Námskeið í Ég get- aðferðinni, sem byggir á bókinni, Börn eru klár, eftir finnska rithöfundinn og geðlækninn, Ben Furman í þýðingu Helgu Þórðardóttur.

Ég get- hugmyndafræðin byggir á lausnamiðaðri nálgun og er í bókinni sett upp á skýran og markvissan hátt sem 15 skrefa ferli sem búið er að þróa og reyna á árangursríkan hátt. Grunnhugsunin er, að þegar börn eiga í erfiðleikum með ákveðna hluti eða hegðun, þurfi ekki endilega að skilgreina það sem vandamál, heldur er litið svo á að börn eigi einungis eftir að tileinka sér ákveðna færni til að ráða betur við aðstæðurnar og sumir þurfi meiri tíma en aðrir til þess.
Aðferðin hjálpar barninu að leysa erfiðleika sína á mjög jákvæðan og uppbyggilegan hátt þar sem styrkleikar þess og jákvæðir eiginleikar eru dregnir fram, auk þess sem áhersla er lögð á að æfa það í almennri samskiptafærni.

Það er gaman að að hjálpa börnum að læra nýa færni og sjá gleðina skýna úr augum barna þegar þeim er að takast vel upp.
Hrós er öflugt stjórntæki og miklu öflugra en skammir og refsingar, þetta hafa vísindamenn komist að, en samt föllum við, sem erum að ala upp og annast börn, stundum í þá gryfju að skamma og vera með aðfinnslur þrátt fyrir þessa vitneskju.

Markmið námskeiðsins:
Að kynna árangursríka leið til að hjálpa börnum
Að gefa þátttakendum möguleika á að tileinka sér aðferðina sem hér er kynnt
Að veita þátttakendum innsýn í lausnamiðaða hugsun

Kennari: Helga Þórðardóttir, félagsráðgjafi og fjölskyldufræðingur.
Helga hefur starfað sem kennari á öllum stigum skólakerfissins og sem félagsráðgjafi og stjórnandi í 20 ár. Hún rekur LAUSN, fjölskyldumeðferð og ráðgjöf.
Allar frekari upplýsingar er hægt að fá í síma 6985881 eða á netfanginu helga@familia.is

mjög langar veglýsingar

Markmið og tilgangur námskeiðsins er að sýna fram á árangursríka aðferð til að ná meiri árangri í lífi og starfi.
Á námskeiðinu eru kynntar ýmsar leiðir að þessu marki og ýmis tækni kennd sem hefur verið notuð og rannsökuð af fagfólki í ýmsum stéttum með miklum árangri.
Námskeiðið er 10 tímar og skipulagt eftir nánara samkomulagi.
Námskeiðið er hægt að panta fyrir hópa, til dæmis starfsmannahópa.
Nánari upplýsingar í síma 6985881 eða á netfangið helga@familia.is

Lausnamiðuð fjölskyldumeðferð hefur þróast á sl. 30 árum, og eru helstu frumkvöðlar hennar hjónin Insoo Kim Berg og Steve de Shazer, en þau eru því miður bæði nýlega fallin frá. Þau hafa skilið eftir sig fjölmargar bækur og greinar um þessi fræði og hafa haft gífurleg áhrif á þróun fjölskyldumeðferðar um allan heim.
Námskeiðið byggir á þessum fræðum og er ætlað fagfólki í vinnu með einstaklinga og fjölskyldur. Helstu áherslur eru þær að leitað er eftir styrkleikum og jákvæðum breytingum í lífi fólks. Litið er svo á að ábyrgðin liggi hjá einstaklingnum sjálfum enda sé hann sérfæðingar í eigin lífi og honum hjálpað við að setja sér raunhæf markmið og ná þeim. Lögð er áhersla á fjölskylduna og styrkleika hennar til jákvæðra breytinga.
Í þessari nálgun er unnið með undantekninguna frá vandanum sem er lykillinn að lausninni!

Markmið námskeiðsins er að gefa þáttakendum kost á að kynnast nýjum áherslum í meðferðarvinnu.
Að gefa þáttakendum kost á að æfa sig í að beita aðferðinni.
Að kenna þáttakendum ákveðna tækni til að nota í vinnu með einstaklinga og fjölskyldur.

Kennari er Helga Þórðardóttir, félagsráðgjafi og fjölskyldufræðingur.
Nánari upplýsingar fást í síma 6985881 eða á helga@familia.is